Zindagi Na Milegi Dobara Shayari

Tu Kyun Rota Hai 

(The poem comes when Farhan is heartbroken after meeting his estranged dad) 

Jab jab dard ka baadal chaya 
Jab ghum ka saya lehraya 
Jab aansoo palkon tak aya 
Jab yeh tanha dil ghabraya 
Humne dil ko yeh samjhaya 
Dil aakhir tu kyun rota hai 
Duniya mein yunhi hota hai 
Yeh jo gehre sannaate hain 
Waqt ne sabko hi baante hain 
Thoda ghum hai sabka qissa 
Thodi dhoop hai sabka hissa 
Aankh teri bekaar hi namm hai 
Har pal ek naya mausam hai 
Kyun tu aise pal khota hai 
Dil aakhir tu kyun rota hai 

Pighle Neelam Sa

 (The poem comes after the trio’s deep-sea dive) 

Pighle neelam sa behta ye sama, 
neeli neeli si khamoshiyan, 
na kahin hai zameen na kahin aasmaan, 
sarsaraati hui tehniyaan pattiyaan, 
keh raheen hai bas ek tum ho yahan, 
bas main hoon, meri saansein hain aur meri dhadkanein, 
aisi gehraiyaan, aisi tanhaiyaan, aur main... sirf main. 
Apne hone par mujhko yakeen aa gaya. 

Ek Baat 

(comes when their journey with Laila comes to an end and depicts the feelings of Arjun's heart) 

Ek baat honthon tak hai jo aai nahin 
bus aankhon se hai jhaankti 
tumse kabhi mujhse kabhi 
kuch lafz hai wo maangti 
jinko pahan ke honthon tak aa jaye wo 
aawaz ki baahon mein baahein daal ke ithlaye wo 
lekin ye jo ek baat hai 
ehsaas hi ehsaas hai 
khushboo si hai jaise hawa mein tairti 
khushboo jo be-aawaz hai 
jiska pata tumko bhi hai jiski khabar mujhko bhi hai 
duniya se bhi chhupta nahin 
ye jaane kaisa raaz hai 

Zinda Ho Tum 

(The poem comes in the climax) 

Dilon mein tum apni betaabiyan leke chal rahe ho, toh zinda ho tum 
Nazar mein khwaabon ki bijliyan leke chal rahe ho, toh zinda ho tum 

Hawa ke jhokon ke jaise aazad rehna seekho 
Tum ek dariya ke jaise lehron mein behna seekho 
Har ek lamhe se tum milo khole apni baahein 
Har ek pal ek naya samaa dekhiye 

Jo apni aankhon mein hayraniyan leke chal rahe ho, toh zinda ho tum 
Dilon mein tum apni betaabiyan leke chal rahe ho, toh zinda ho tum